Bedside Manner

美：你可唔可以睇下我個friend呀？

T: 做咩呀？

美：佢個鼻打到歪咗呀。

T: 吓？邊個同佢打？

美：大陸打㗎，唔知呀。

T: 打咗啲乜？

美：唔知呀。

T: 打咗幾多？

美：唔知呀，個醫生一打就打完，之後就發現歪咗喇。

T: 咁個醫生點呀？

美：佢話冇歪囉

T: 咁... 睇下溶唔溶到啦...

有冇試過以下情況？

1. 個醫生噏完一輪完全唔知佢噏乜？

2. 個醫生睇症眼尾都冇望下你？

3. 睇完個醫生覺得佢流流地？

4. 睇完個醫生好想打佢？

咁你又有冇試過

1. 睇完個醫生，雖然佢唔係好多名銜，但覺得超安心？

2. 睇完個醫生已經覺得好咗？

3. 睇完個醫生，雖然唔係好明佢噏乜，但覺得佢真係好勁好啱？

4. 睇完個醫生，覺得佢如果係我老公/ 老婆就好？

老實説，讀醫是否好難呢？其實人體是一本manual，讀醫就是要你熟讀這本manual。本manual有好多chapter，還有無限的update同appendix。醫科生就是要讀完所有chapter的introduction，專科醫生就是要集中熟讀一個chapter加所有update，教授就是寫appendix的人。這件事其實有點像毒男沉迷打機，醫生只是沉迷讀書而已。

咁係咪讀得越熟就越勁？

一個好醫生跟一個一般醫生的最大分別除了醫術外，更重要的是醫德，同理心同溝通技巧。為什麼有些醫生你覺得跟他很合得來又覺得佷安心，其實並不是因為他花了很長的時間，亦不是因為你的病特別難醫，而是因為他很集中專注去關心你，解決你的問題。所以新一輩醫生的curriculum大大加強了溝通這一環。

我見過有些醫生，特別是女醫生，溝通能力天生是很強的，在見習時期已經可以駕輕就熟。其他沒有那麼擅長的，就唯有靠training。有些training，教的時候覺得是廢話，但一開始要見病人見家人的時候就知道是多麼的有用，所以在專科訓練，也要再培訓這一環。另一個令人開始有同理心的原因就是經歷。一個二十多歲的人怎麼可以明白喪親的痛苦、疾病的難受和失眠的煎熬？就是從自己接觸到這個經歷開始，才懂得明白別人的感受。

醫生到香港行醫我沒什麼好說。為什麼英美襖的醫生容易接軌？並不是他們的書讀得特別多，而是大家的文化水平及要求都相似。至於其他國家，書的內容可能一樣，但是如果醫生把他的光環放高於一切，而他看見的人命又不是這麼可貴，那我們可以要求的醫療水平就先退到不要醫死人吧，溝通/同理心及醫德這些文化差異，就跟其他一切的其他事一樣，包涵一下。

香港的房屋土地教育已經變成這樣，醫療之後的...是法律吧。

簽約前擘大對眼

健： 你張同意書駛唔駛咁長同埋啲字咁密呢？

T: 已經算短㗎啦。

健：即係想點呢？

T: 我怕死嘛。

健：好似簽賣身契囉。

T: 咁醫委會好嚴嘛，咁佢又要啲醫生講清楚最常見同最嚴重副作用嘛。無論乜嘢藥最嚴重就係過敏，過敏最嚴重就係死，所以而家啲同意書差唔多張張都講到你會死囉。

健：吓？都唔make sense嘅？

T: 你講㗎咋。

簽同意書你可以瞇埋眼，但係簽合約就真係要擘大啲對眼睇清楚。

分享個朋友個案。

朋友好叻仔，在他的行業裏獨當一面。叻到咁上下，自然就覺得被公司剝削，亦沒有得到配合，更沒有發展空間。機會來了，有一家外資公司在香港插旗，朋友當然覺得是絕好發展機會，二話不說拉人拉隊拉客過檔做開荒牛。而香港好明顯就係有錢大哂，有錢的大公司更加大哂，由於朋友太高調，舊東家為了殺一儆百，控告朋友違反non-competition clause。
告入咗，朋友要嘔堂費連賠償相等於一年人工出來，唯有連續兩年每個月出半份糧，另一半糧用來還債。

故事未完，朋友以為執到筍盤，其實只是由一個火坑跳入另一個火坑，為新公司仆心仆命老外老闆完全不領情。三年後的今天，他意興闌珊，沒有選擇之下要離開香港去另一個國家開展新生活。四十歲人，錢儲不多，人脈關係工作根基全面一筆勾銷，一切從新出發，還要在外國，一子錯滿盤皆落索。

唔好以為唔關你事，好多人簽約時都唔知自己做緊乜。在外國重新開始，不是每個人都可以。

合約我簽過不少，瀨過嘢，忐忑過，律師費亦交過，這裡分享一下。

簽約第一件事：擘大你雙眼。

「公司份contract係standard㗎。人人一樣㗎，佢地都有簽。」

「呢啲遁例㗎咋。」

「寫係咁寫啫，咁大間公司咁多人點會逐個去告？」

「你唔駛擔心咁多啦。」

「咁都要保障番公司嘛。」

我聽過最離譜的係：（當然又係醫生俾人呃啦）

「份contract你睇完就簽咗佢，唔簽冇得拎走㗎。」

記住，HR嘅人唔係你朋友，佢地唔會企响你嗰邊，they don't care, they just want to get the job done。所以佢地對你面露不悅純粹因為你阻人收工。

第二，簽咗名就有法律效力，無論是什麼不平等條約，唔fair 唔make sense，或者你係完全睇唔明，這份文件都是有法律效力的。行不行使是一件事，法律精神是要被尊重的，發癲好瀨地硬好，手尾是可以很長的。

第三，律師費每小時四千元起。

贏在射精前

美：有冇睇電視呀?

T: 冇呀，做咩？

美：有個阿媽話唔止要贏在起跑線，仲要贏在射精前𠻹呀。

T: 我知呀，Facebook洗咗板啦。

美：而家啲阿媽真係... 

T: 我凈係想贏在收工前，個麻膏起得未？打得未？打得未？打得未？

美：得喇得喇得喇...

前幾輪看了一個TED talk是關於自閉症的。

https://youtu.be/wKlMcLTqRLs

自閉症是什麼呢？

其實有三個主要症狀範圍：

1. 社交發展遲緩

2. 溝通能力弱

3. 傾向重覆某些活動

（係咪好似你同事呢？）

注意：智力是未必受影響的。

這個問題影響著全世界二千多萬人。

「我地以前邊有咁多問題㗎，咪一樣好好過？」上一輩西醫朋友說。

其實過去的二十年在這方面得到了很多的研究數據，亦對醫生提供了很多的資訊去提高這方面的意識。

而最多人的誤解是：個仔有自閉症喎，死啦。

其實正如很多病一樣，自閉症亦有分不同的嚴重程度，由極輕微到極嚴重。大部分的小朋友都不用吃藥，但我們都盡量把個案找出來，為什麼呢？是為了配合治療。

治療包括甚麼呢？

1. 認知

2. 培訓

3. 協助

認知，即是讓患者及身邊的人了解，他的社交是較弱，不代表他懶或人不好。亦令他自己知道在某些情況下要特別努力。

培訓，即改善弱點。社交弱就安排多些訓練。老實說，我們有多少人是天生花蝴蝶，在人群中如魚得水？有多少人天生識做領袖，還不是需要培訓？

協助，即是不要「邊壼唔開開邊壺」，明知説話能力弱去做sales 就當然死梗，倒不如宅在公司寫programme或者入數，生產力更大。

所以綜合來說，自閉症是一種障礙，我們每個人都總有各式各樣的障礙，及早發現不是為了判死刑，而是令一個人可以發揮到其個人最強的效能。

這個TED talk令一個亮點就是Dr. Chung 的presentation，收放自如又清晰又passionate，真係要學。

說了這麼多其實是想帶出，養一個小朋友是一世的承諾，由出世到成長實在有太多的不肯定性，一個扭曲的家長只會養出一個扭曲的兒童。港女長大了變港媽，港女最大特質是什麼？

I am winning it ALL. 

你養的不是你自己，你的孩子不一定會贏，也沒有所謂的贏。

要贏在射精前好簡單，戴番個安全套，唔好禍害下一代。

韓男

美：有冇睇TBB套劇呀？

T: 冇呀。做咩？

美：阿X姐個樣好假囉。

T: 係？

美：仲做代言人㖭。

T: 可能佢鍾意呢。

美：真係唔整仲好過整。

吳彥祖日前接受內地傳媒訪問，大談現正流行的「韓式花美男」現象，Daniel 指這種形象會影響戲路：「很多人會變成韓星的樣子，就是頭髮化妝要奇怪，男人不像男人啊那種感覺，這我不是特別明白！很多韓星那個樣子是因為他們是歌手，不是演員，如果你這樣打扮，會影響你做演員的感覺。」

首先如果已經入行，就建議不要再大執了，畢竟現在科技進步，陳年舊相全部一覧無遺，二度發育三度發育化妝技巧呢啲爛藉口真係唔駛再講。少許微調抗衰老是需要做，但輪廓改造就大可不必了，（即是隆胸割雙眼皮隆鼻隆下巴）如果是戲屎，鼻樑高了大概都是一樣戲屎。

韓國流行微整，藝人非藝人都非常接受這一套。但不同之處是韓國有表演學校，在出道前通常已經準備好，該整的都已經整，不會給人前後圖找不同的機會。

可是男女輪廓大不同，韓國微整技術和審美角度都偏向用上女生的標準，所以很多時做出了很「靚」的男藝人。

完美韓妹臉到底有什麼標準呢？這個話題講三日三夜都講不完... 簡單地討論一下吧

1. 白。透白，零毛孔，零斑零色素。

2. 零皺紋。

3. 心形面。（飽滿蘋果肌，瘦小面，圓潤下巴。）

4. 雙眼皮 。(+大眼仔）

5. 挺直鼻樑。

6. 小嘟咀。

7. 飽滿前額。

大家可以看看現在新一代當紅的韓國男星不多不少都有這些輪廓特徵，李秉憲一類國字臉滿滿男人味的已經買少見少。

AB姐

健：點呀你近排？
T: 唔開心。
健：做咩？
T: 公司囉。你呢？
健：好眼瞓。
T: 啲同事近排唔聽話...
健：Zzz...
T: 喂？
健：Zzz...
一邊打水光槍可以一邊瞓，我啲有冇技術好到咁？

選擇題，我有兩個同事
A. 冇錯姐。成日唔記得嘢，講完又唔記得，又唔去嘗試記得，咁點？咪瀬嘢囉！瀬完點？咪我執屎囉。點解唔係佢執？因為佢唔記得佢做錯囉，所以佢係永遠冇錯㗎，所以佢執完屎之後係會有更多屎。之但係啲客又好鍾意佢好buy佢喎。
B. 計較姐。有乜so先？冇so做乜要做呢？呢啲冇錢嘅hea 做得啦。冇做錯冇人投訴咪得囉。

各位留意，以上兩位並唔係九十後。
有時候呢，old seafood更難頂，因為佢地係會响公司規矩同底線上遊走。

俾你係老細，炒邊個？

其實請人時個個嘅CV都寫到天花龍鳳，見工又表現得面面俱圓，老實講，如果你要的人工比一般人高，老闆一定會要求你的表現比一般人好，最重要是自動波唔駛煩。最怕係搞是搞非玩小圈子玩排斥新人。

計較姐好多時都會話九十後唔識做人，但係人地一星期已經駕御到成個電腦system，你學咗兩年喎。（話時話佢第一日返工已經話佢唔識用電腦，但係check 單計自己人工就係光速零誤）

而冇錯姐當然係千錯萬錯天錯地錯都係個客錯公司錯規矩錯唔係佢錯啦。睇佢接投訴就最過癮，因為佢嘅潛台詞係總之我冇錯，所以是永遠傾唔成的。有時客人投訴可能真係純粹擔心，並無其他潛台詞，呢種心態會令自己完全看不出可能發生的問題。（好多關公case都係咁嚟）

回到原來問題，有冇人覺得應該有教無類兩個都留低？

老公唔知就得（二）

T: 「呢間咖啡店個老闆好靚仔㗎，啱你呀！」

健：「係？」（偷笑）

T:「杯咖啡得唔得？」

健：「聽聞呢，啲渣啲嘅咖啡豆只可以輕炒，所以酸度高啲。」

T：「真係㗎？你好叻呀！」

健：「好叻已經聽太多，你可唔可以讚番我靚呢？」

T：「你好靚呀！」

健：「妖好假囉你。」

上回講到，在醫學美容界，其中一個最常見的要求是：唔好俾老公見到。

有網友留言，結咗婚仲整乜鬼容？

冇錯喇，所以咪唔俾你知囉。

情況就等於阿媽話：「咁大個仔仲砌高達？我同你掉哂佢！」

大家辦公室都可能有個女同事，文書工作，害羞但能幹，柄埋一二便，日日pack lunch，短髮厚眼鏡，每天黑色冷衫黑色褲，皮膚好心地更好，但有人約她出街嗎？冇。

冇人望，心地幾善良都係冇人見到㗎。

（死，自己都覺得自己mean，真話真係好傷人）

女士們扮靚（包括整頭/化妝/扮靚/買衫/買鞋/買袋）無非得兩個原因：令自己開心同氹男人開心。

講番唔俾老公知事件，有個律師朋友，他喜歡𡃁模look，即是長頭髮，水汪汪大眼睛（大眼仔），長睫毛（假），間尺鼻，白滑肌，瘦，極瘦；但矛盾點是要純天然so organic嗰隻! 咁當然聰明嘅你知道這件事根本是不可能啦。而她帶的「女朋友」，就好似車展女模show一樣，正如黃子華所講，她們是喬裝，已經超越了化裝個level，但律師朋友好自豪有一些又靚又索又後生的女朋友，而我，當然一眼就知道她們的五官是違反了自然定律。但當女朋友的若無其事，律師朋友又無動於衷，我還是乖乖地陪陪酒就好。在dating時沒有坦白，結果就是可能要呃一世。

講番啲正面訊息，醫學美容其實分兩個範疇，一個是抗衰老，一個是輪廓改造。大家見到的假鼻假下巴假雙眼皮，其實是失敗的輪廓改造，成功的個案必須要配合本身的面型結構。而抗衰老就是預防衰老，就例如羅霖溫碧霞，暫停變老，做的時候可能無甚感覺，但一到中學同學聚會，見到同學們已經變成花師奶同大蕃薯，你就會知道，投資自己是不會白費的。

流感針？打死你呀！

美：「你近排做乜同人筆戰呀？」

T:「嘠？」

美：「你寫番醫美嗰啲咪好囉！」

T:「我有叫人唔好番大陸打針㗎。」

美：「你講番多啲HIFU呀，水光槍呀，超聲刀呀啦。」

T:「我鍾意鬧交嘛。」

美：「你唔好啦。」

Oops, 又嚟。

延伸閱讀：https://www.facebook.com/SharingTCM.HK/posts/503933626482575

我覺得佢又錯唔哂喎。

流感疫苗有冇副作用？有

特敏福有冇副作用？有

如果該小朋友打咗流感疫苗係咪唔會出事？唔知

如果該小朋友食咗特敏福係咪唔會出事？唔知

唔打流感針小朋友患上流感而又唔食特敏福係咪一定會死？唔係

即係點？
大家响度講緊個「如果」的問題，又冇前文後理，得個講。

研究顯示幼童及長者接受了流感疫苗可明顯減少併發症包括死亡機會，而確診流感人士在48小時內服食特敏福亦可以減少併發症包括死亡機會。

咁即係唔係包好包冇事啦？你地班醫生又要威又要戴頭盔！
係㗎，冇包好㗎，咁你可唔可以同廣大嘅市民同家長講，係呀，你哋要接受呀，你個小朋友呀，係可能會死㗎。

這句是真的，病，冇人想，尤其是至親。但是，自然法則告訴我們，很多人是有可能因為傳染病及其併發症而突然離開，我們是什麼都。做。不。了。

醫生的角色其實是在盡力做最好的診斷和選擇最好的治療。但我們必須承認，目前西方醫學是有其所限，從來不是萬能。

校訓：To cure sometimes, to relieve often, to comfort always. 

各位auntie，你唔好呃我

美：美容院老闆個「朋友」，藐咀藐舌

T: Dr. T

美：點呀，醫生，你覺得我有乜要做呀？

T: um，你想改善邊個問題先呢？

美：主要係啲膚質問題囉。

T: 咁你接唔接受到針劑呢？

美：得～我都做呢行，仲做咗咁耐，乜都接受到嘅。

T: 哦～咁你打過啲乜嘢呢？

美：冇喎。全自然㗎！

得喇，唔駛講喇。

我已經講過好多次，你可以呃你老公，呃你條仔，呃你個仔，但係唔好呃我。(延伸閱讀：醫生師妹，你唔好呃我)

憑我雷達眼一睇都已經知起碼打咗Sculptra蘋果肌，做咗透明質酸鼻樑下巴填充（仲歪嘅），加埋瘦面針，另外仲填充額頭填到一忽忽。冇錯可能我冇你响呢個行業做咗咁耐，但唔代表係蠢/廢or 盲。

另外响度再一次向廣大市民強烈呼籲：

千祈唔好向醫生隱瞞病情，雖然有啲病係可以看出，但有好多其他病是很容易忽略的。尤其是嗰啲「唔話你知睇下你堅唔堅先」的人士，斷錯症開錯藥對任何人都沒有好處。其實有時醫生失魂都可能其實只是諗緊另一個病人，唔係hea緊你。仲有唔知係咪睇得太多TBB啲「律政XX」「法政XX」同「XX皇庭」，有一啲人係抱住「我睇下你邊句講錯你就死」嘅心態，簡稱「挑機」，點呀auntie？我地好忙喎。

所以不要介意現在越來越多醫生為了提供完美無瑕兼零錯誤答案，唯有大包圍做多點化驗，到最後浪費了的是你時間和金錢兼虛驚一場。可惜自從回歸之後，人與人之間的信任似乎越來越弱，看來大包圍情況只會越來越厲害。

另外其實有一些醫生同事是日日都好擔心看錯症看漏症，去到患上焦慮症的地步，真係多得你唔少。（讀得醫都唔係蠢人，發揮唔到自己應有功能其實真係好可惜）

老公唔知就得（一）

T: 有冇人話你靚咗唧？
健：冇喎。
T: 唔係啩？
健：不過少咗人話我殘囉。
T: 吓...
健：少咗彈就等於讚㗎啦。
T: 係？
健：唔通周街有人問我係咪整咗容好咩。

做了醫學美容這麼多年，其中一個最常見的要求是：唔好俾老公見到。
意思是：靚咗，光采咗，自信心多咗，又有人讚，睇得出落咗工夫，睇唔出係有外援。
你話女人幾矛盾幾疲累呢，不過其實這個要求很合理亦不難實現，所以現在醫學美容越來越普及亦越來越受歡迎，但最重要還是找到對的醫美診所。

至於不能讓老公知道的原因不外乎是：
「佢唔俾㗎。」
「佢唔鍾意㗎。」
「佢俾我做facial，但唔俾我打針㗎。」
「佢驚人地話佢老婆整容呀。」
「離婚都有份呀。」

其實綜合來說都是不了解不明白及負面評價多。
等於很多女人不明白廿幾個男人追著個波究竟有幾好睇，十幾隻馬鬥快有幾刺激同炒股票有幾可係好嘢一樣。

有個朋友，她瞞著老公做了個隆鼻手術，對！是。手。術！然後聲稱跟密友去台灣旅遊一星期，有冇去唔知，但個鼻就好明顯地立體了漂亮了很多，而結果呢？老公完全看。不。出。來。

男人有時真係好鬼蠢（?唔sensitive/ observant)，所以大家可以：
1. 唔鬼理佢
2. Don't ask don't tell
3. 放棄自己
4. 進行教育
5. 理性地做一些安全自然的療程

（再續）

西藥？食死你呀！

美：美麗的美容師

T: Dr. T

美：我阿爸好煩呀！

T: 點解嘅？

美：佢個腎有事又唔肯睇醫生，成日就驗血，驗完就話自己就黎死，撞鬼。

T: 佢自己做中醫喎。

美：係囉，更唔想面對現實囉。

T: 咁點呀？

美：咪強迫性要陪佢囉。

延伸閱讀：https://www.facebook.com/SharingTCM.HK/posts/500074826868455

其實，醫生開每一粒藥之前都會衡量過好處多還是壞處多。

每位需要服食薄血藥的病人都是要經過嚴格評估的。

醫生會用他們的年齡，病程，病史等計數，然後得出服食藥物對底是否值得。

一般來說，需要服食到薄血藥的都是因為已經中過風或已經有心臟病並且再復發機率高的病人。

而壞處就是要長期服食，定期較藥及出血機率增加。

例如：

中年男仕，有糖尿病，血壓高並有心臟病史，他服藥的好處肯定很多。

相反， 若果是八十歲伯伯跟以上一樣就未必一樣，因為他未必能介口並很高機會跌倒流血不止，所以好處不一定較多。

等於你要我打鼻，然後我知道打完之後你會變成阿凡達二號，我必然會先同你講，做不到做不好的，不如不做。

醫生不介意讀書，不介意長時間工作，不介意沒有一句唔該或多謝，但我們很介意有很多人用很多方法去挑撥醫生病人間的關係，把醫生都塑造成害人或斂財的偽君子，這樣其實是增加了我們的工作時間和難度，急症室的輪候時間亦因而越來越長。

其實每年都有一些西藥被禁，是誰發現的呢？是我們西醫。
對，我們給你的未必是最好，但是我們給的都是根據當時最佳的研究數據，過千或過萬的研究，並不是我只之前睇那三數人的經驗。另外我們還會不斷改善，自我檢討並勇於認錯。
中醫，在中國存在了多年，必然有其獨特之處。但多年來中醫學受批評之處都是缺乏系統，缺乏科研，極依賴師徒相傳及醫者的經驗。所以，目前對中醫學的研究都有著革命性的結果。

中風，不單只摧殘了一個人，還對他的家庭工作朋友都有極大的影響。不是一個人，是一個家庭。

所以當你在不斷批評的同時，你可以給予更佳的治療並提供更佳証據嗎？

不要低頭，光環會掉下來

美：好煩呀。

T: 做咩？

美：我要同陳太做facial呀！

T: 陳太好nice㗎！

美：但係佢係Helen個客嚟㗎。

T: 佢唔得閒咪你做囉

美：唉呀，唔想做呀，廢事佢話我搶佢個客呀！

什麼是美麗？

這個是我很喜歡教的題目。因為美麗可以是很客觀也可以是很主觀的。要講，一世講唔完。Get到的，很快get到；Get唔到的，一世get唔到。所以有很多鬼五馬六的醫生，把自己和客人都攪到一塌糊塗，醫學是很技術性的，但美學就是另一個世界了。

有社會科學研究顯示，越平均（average）的臉越美麗。對，是越平均，所以理想臉型輪廓其實是一張大眾臉。現在超模界喜歡「奇怪」的臉，大概因為已經看膩了完美的臉。所謂的奇怪是指偏離大眾的臉，例如眼矩濶一點，咀巴大一點，雀斑密一點或白蝕多一點。而這些奇怪臉的主人接受訪問通常都會透露兒時被欺負的回憶。一個高人一截、平胸、眼大大的美麗女孩，很難不是對象吧。要令自己變美，最快的方法就是把對手剷除。

欺凌（bullying），看似遙遠，其實很接近。在香港，你和我多多少少都目睹過吧，當然我們的社會是比較喜歡用心靈虐待多於身體虐待的，她們不會把你打到爆缸（因為驚自己有手尾），而是唔同你玩，孤立一個人；心靈虐待最毒的地方就是把你推向死角然後令所有人都不敢接近或不敢變成你。

可以攻擊的對象包括什麼呢？一些不能改變的特徵：性別，膚色，體型，性向。太高，太矮，太肥，太瘦，胸太大，胸太小，長頭髮，短頭髮，太黑，體味，讀書成績，運動能力。將自己的不安全感用別人的所謂弱點去墊屍底，毒害其他靈魂去拯救自己的靈魂。最可怕的地方是這種小學雞玩法並不止於小學，而是一直蔓延至中學大學職場。只要你在Starbucks坐十五分鐘看看人，就會發現大部分人都是穿黑藍灰，寒著背而目光都是冷漠的。

甄妮曾經着著一件大deep V講過一句：「驚就唔好着，着就唔好驚。」

要是害怕別人的說話，一輩子也不用離開家門。到了這個年頭，要是還可以飛，就飛吧。

減肥唔係咁減㗎

女: 靚女

T: Dr. T

女: 好肥呀！

T: 你肥？

女: 諗住襯夏天去拍啲sexy照呀。

T: 幾sexy先？

女: 咪就係睇下有幾瘦囉。有咩減肥餐單好？

T: 辛苦定唔辛苦？

女: 唔辛苦。

T: 冇㗎喎。

Juice Diet 可說是近年來最搵笨最把鬼的減肥方法。

1. Juice 基本上是一整支糖水。果糖經身體分解後亦是糖，沒有比誰高貴。世衛已明顯表示高糖飲食對健康明顯有害，故建議大幅減少每日的糖攝取量。高糖飲食的害處包括增加糖尿病，心臟病及中風的風險。

2. Juice 裏面所含的維他命鑛物質基本上很微，倒不如吃兩粒維他命補充藥丸。

3. Juice 裏面的纖維已經全部被打爛，作用甚少。況且，做juice的蔬菜通常都比較低纖，高纖菜打出來的像槳糊，誰要喝呀？

4. Juice diet 用的只是卡路里法則，攝取少於使用的，身體自然瘦下來，但這個方法並未有較健康。

5. Juice diet 會令你欠缺蛋白質，身體瘦下來但肌肉量也少了，是沒有線條鬆爬爬的瘦。

6. Juice diet 的糖水令你身體每日定時釋出大量胰島素，不單只令你更累，也更容易儲存脂肪。

7. Juice diet 並不是一種可以持之以恆的方法，停止之後只會吃更多。

8. 一星期的Juice diet 索價差不多三千元，你知道可以買多麼大量的新鮮蔬菜嗎？

9. Juice diet 令你皮膚更好頭髮更亮，這根本完全沒有科學根據，一星期的diet 亦不會令你有根本性的改變，只可以說你身體受了很大的刺激。

10. Juice diet 令你 feel good， 這我無話可說。

Dr. T 同你講保險

美: 呢度啲海膽丼好得㗎!

T: 做乜咁好請我食日本菜？

美: 你幫我扮靚靚嘛。啲海膽好甜好新鮮㗎！

T: 太客氣喇！

美: 咦呢個加埋三文魚子好似靚啲又平衡啲喎。

T: 係喎。

美：咁呢個三色丼有埋拖羅仲正呀。

T: 都係。

美: 咁不如要呢個雜錦魚生丼啦，乜都可以試哂。

T: 咦？

今日醫生同你講保險。（不是員工/ 冇收費）

跟你說個小秘密，我們大部分人都會死於：

A. 心血管病。即是心臓病，中風，腎病等

B. 癌症。

如果你不吸煙/ 常做運動/ 注意飲食，你死於B的機會更高。

現在癌症的藥物越來越多，就算沒有增加治癒率但起碼生活質素可以提升。但這些新藥價錢貴，不在公立醫院免費藥範圍，你需要自費。

今時今日香港人爭學位爭單位爭床位，香港近免費的醫療系統全靠政府津貼，新香港人越來越多budget反而可以越來越減，醫療系統淪陷遲早爆煲是鐵一般的事實。接近免費的東西用久了我們只會質疑為何質量那麼差。除非不做，否則怎能不錯？除了不能錯還要服務（服侍？）病人，醫護人員的熱誠如何不滅，但身心靈總會磨蝕。各位看病要快要趕要舒適，為自己為家人最好買一份保險。

在醫生角度保險最有用的有三種：

1. 危疾

即是你患上嚴重疾病就可以得到，怎樣運用由你自己決定。一生人就賠一次。你可以去一年日本不醫病也可以。

2. 住院

即是你有急病需要入院做手術/ 治療，賠償看嚴重程度及購買金額。

3. 人壽

即是你香咗你家人會收到錢傍身。

如何投保呢？首先你應該只用你入息的五至十巴仙投保。記住，這是投保，不是投資，不是儲蓄。你現在是想食海膽丼，唔好食下食下變咗雜錦魚生丼。保險公司係負責賺你的錢，唔係為你賺錢，佢背後係有一堆好叻好叻計數的人日日集中計數的，除非你比人類平均壽命短廿年，否則你係唔會得到著數㗎。放在銀行隨時可無條件提款的才稱為儲蓄，放在保險公司的是保險，不是儲蓄不是投資，不要誤會。

返回正題，保險還是要買。

以上三種應該如何買呢？要看你可供款項有多少，不多的話請你集中買危疾，因為你有大病時是最無助而又最需要錢。如果家人完全依賴你照顧，你又好愛他們的話，你才需要買人壽，因為你患了大病時得到危疾賠償，你自己是可以任意使用或者到公立醫院，將大部分留給家人的。住院的話，有錢就要買一下，急病沒有人預計得到，但萬一不幸而又沒有買的話，公立醫院還是可以幫到你的。

例子：（供款為月薪5-10%）

基層: 100%危疾

中產基層: 70%危疾 30%住院 

中產有為爸爸/ 媽媽：40%危疾 30%住院 30%人壽

金融才俊：相信你不用我教你怎樣做

有個有錢daddy: 你已經內置了人生最大保險

最最最把鬼的是基金單。

首先， 基金本身已經好把鬼。個前設係，有「專業」的基金經理幫你投資。但係唔一定賺㗎喎，賺咗蝕咗佢都照出糧㗎喎，佢咁專業，賺係佢叻蝕係市場問題，仲有購入費呀，佣金呀，基本上一買你已經冇咗幾個巴仙，轉來轉去再蝕一截。仲有，除非你係private banking客，否則冇人俾你拍枱鬧㗎喎。

第二，保險公司只係有幾十種選擇，銀行選擇多好多。

第三，有一啲基金一星期只有一個交易日，個價完全不能控制。

再者，你真係有需要投資黃金商品海外巿場咩？早幾年金鏄四國已經香咗啦。

仲有，你供强迫金仲未供夠咩？

記住，你現在是想食海膽丼，唔好食下食下變咗雜錦魚生丼。

九十後職場需知

美: Dr. T，你幫我睇下面呢啲一粒粒係乜？
T: 疣嚟喎!

美: 即係乜嘢呀？

T: 皮膚表層上的過濾性病毒感染呀！

美: 吓？咁點呀？

T: 咁大量最好用二氧化碳激光脫咗佢啦, 如果唔係就好易傳染，越來越多㗎啦。

美: 我點得嚟㗎？

T: 摸完其他人抓吓自己，家人最容易傳染啦。話時話你有冇玩試妝？

美: 唔得㗎？

T: 你估吓佢支掃同個撲用咗落幾個人度？

壞份子是要馬上去除的，否則只會引來來越多壞份子。我公司剛好除去一個，全公司合資請小鳯姐。

九十後，其實已經是成年人了。我明白，十多二十歲的你可能完全不知道自己想要或者想做什麼，但有一天你需要打工（或者是），以下是我想告訴你的事情：

1. 世界上沒有一份工人工又ok，又舒服，又冇壓力，又有自主權，又有work life balance 的，有的話請你聯絡我。

2. 每個人返工不是為自己賺錢而是為公司賺錢的，否則我們泛稱為冗員。

3. 廣結善緣，工作做得不好可以陪訓，人緣不好是死梗。扮cute娃娃音死最快。

4. 工作上的是同事，客氣就好，人家沒有必要成為你的朋友。

5. 請得你已經代表了你的能力，如果你有能力，工作會變多自由度變大，如果你廢，規矩制肘就越來越多。所以你完全不用向全人類宣告你的能力，人家只會當你白痴仔。還有，你不是小學生，不會有人摸摸你的頭讚你好孩子。

6. 小嗲可以怡情，勁嗲係種死症。沒有一個女人受嗲的，除非是你媽媽，勁嗲的你好快被孤立。男人是受嗲的，他們的下體更受嗲，你覺得冇事的是你諗少咗，你覺得有用的是你太天真。老闆受陪瞓的話應該有條隊，唔該望清楚隊尾。

7. 不要瞞天過海，你那副裝出來的笑臉，auntie 單眼看得穿。

8. 不要玩是非，因為個個auntie都玩咗十幾廿年，你仲未出世。

9. 不要藐同事（甚至老闆），局長被公審再鞭屍多次仍然屹立不倒，就知道老闆看中他夠白痴夠厚顏頂得住啲鑊。

10. 你可以不喜歡你的工作，甚至邊打工邊搵工，但請你把工作做好，這是你的人格及專業操守。人格沒了，你什麼都不是。

我承認，我太天真沒帶眼請人，我返去罰抄三百次。

大家跟我講多次：我唔去大陸打針我唔去大陸打針我唔去大陸打針（二）

美: Dr. T，睇你放假放得好開心呀吓。

T: 係呀，再唔放假我會顛㗎。

美: 咁你去完日本爽哂啦。

T: ok㗎。

美: 有冇食嘢好介紹先？

T: 有，你睇我Instagram 嘛。

美: 你唔厭㗎咩？

T: 一。啲。都。唔。會。

去日本，令我提醒自己，做人要認真。

上星期講完貪平打美容計, 話咁快今個星期就到黑心疫苗，都係嗰句啦，唔好番大陸打針。正當大家都嫌棄大陸人來香港搶床位搶奶粉搶金，你就知道大陸有什麼東西你不要做。

疫苗，主要是用小量細菌或細菌一部分令身體產生抗體。疫苗分很多種不同製造方法，有的是細菌殼，有的是昏睡細菌，有的是細菌部分。疫苗最重要及最昂貴的是運輸及存放。微小問題如運輸時間長短/過程/方法甚至連途中停電其實都有指引。當然如果跟大陸出事供應商一樣將昏睡細菌放在室溫，昏睡細菌就會變成活躍細菌兼不停自我繁殖，打疫苗最終變成一針高含量的純菌。

老老實實，一間二人公司，可以一鑊玩起成個大北方，就知道大陸醫療有幾兒嬉。當然，背後的老闆是誰/為什麼是單一供應商/為什麼會購入平價疫苗/之前有沒有發生過等等的問題我們還是不要問。

日本大部分人會好認真地重複又重複仔細地做一件事，就算好無聊，他們都做得很認真。做大事要賺大錢的人，真的不用分得那麼細。

簡單講，去板X壽司見到金毛師傅扮帶著口罩邊吹水邊「砌」舊壽司，我係真心懷疑佢知唔知生同熟嘅分別。